निजगढ नगरपालिकाबाट मोटरसाइकल चोरी गरेको आरोपमा निजगढ प्रहरीले बाराको कोल्हबी र रौतहटको गुजरा नगरपालिकाका २ जना युवकलाई पक्राउ गरेको छ ।
ईलाका प्रहरी कार्यालय निजगढको टोलीले कोल्हबी नगरपालिका वडा नम्बर ११ बस्ने प्रलाद चौधरीको छोरा वर्ष २८ को राकेशकुमार चौधरी र रौतहट जिल्ला गुजरा नगरपालिका वडा नम्बर ८ मनहर्वा बस्ने कृष्ण चौधरीको छोरा बर्ष २४ को मिथुन चौधरीलाई चोरीको मोटरसाइकलसहित मंगलवार पक्राउ गरेको हो ।
निजगढ नगरपालिका वडा नम्बर ८ वडा कार्यालय नजिक पार्किङ्ग गरेको स्थानबाट प्र.२–०३–०१९ प ८०५८ नम्बरको निलो रङको १५० सिसिको आपाचे मोटरसाइकल सोमवार दिउसो चोरी भएको थियो ।
मोटरसाइकल चोरी भएको भन्ने सूचनाको आधारमा प्रहरी निरीक्षक सुमित कुशवाहाको नेतृत्वमा खटिएको टोलीले चोरीको मोटरसाइकलसहित उनीहरुलाई निजगढ ८ स्थित तामागढी गेट नजिकबाट नियन्त्रणमा लिएको हो ।
पक्राउ परेका दुबैजनामाथि आवश्यक कारबाहीको लागि जिल्ला अदालत बाराबाट बुधवार म्याद थप गरी अनुसन्धान भइरहेको प्रहरी निरीक्षक कुशवाहाले जानकारी दिए ।
