निजगढ,
निजगढ ७ लच्कास्थित श्री सत्यश्वर शिवशक्ति आधारभूत विद्यालयको ४३ औं जन्मजयन्ती तथा ४४औं अभिभावक दिवस हिजो विभिन्न कार्यक्रम गरेर मनाइएको छ ।
विद्यालय व्यवस्थापन समितिका अध्यक्ष हरि चौलागाईको अध्यक्षतामा भएको सो कार्यक्रमको निजगढ नगरपालिकाका नगर प्रमुख सुरथ पुरीले उद्धाटन गर्नुभएको थियो । कार्यक्रममा बोल्दै नगर प्रमुख पुरीले शिक्षाको गुणस्तर उकास्न आधारभूत तहको पठनपाठन राम्रो हुनुपर्ने बताउनुभयो ।
कार्यक्रममा चालु शैक्षिक सत्रको वार्षिक परीक्षा र विद्यालयले संचालन गरेको खेलकुद प्रतियोगिता तथा अतिरिक्त क्रियाकलापमा उत्कृष्ट हुने छात्रछात्राहरुलाई पुरस्कारसमेत वितरण गरिएको थियो ।
कार्यक्रममा विद्यालयका बालबालिकाहरुले चेतनामूलक, गीत, नृत्य र लघु नाटक प्रस्तुत गरेका थिए । कार्यक्रमको उद्धाटन सत्रमा नगर प्रमुख पुरीसहित उपप्रमुख सोममाया थिङ्ग, निजगढ नगरपालिकाकी पूर्वनगर उपप्रमुख लिलादेबी लामिछाने, स्थानीय समाजसेवी घनश्याम लम्साल, भोजराज अधिकारी, बासुदेव तिमल्सिनालगायतले बोल्नुभएको थियो ।
विद्यालयका बालबालिकाहरुले चेतनामूलक, गीत, नृत्य र लघु नाटक प्रस्तुत गरेको कार्यक्रममा व्यवस्थापन समितिका पदाधिकारी, अभिभावक, जनप्रतिनिधि र स्थानीय समाजसेवीहरुको उपस्थिति रहेको थियो । कार्यक्रमको संचालन शिक्षक हरिशरण सुवेदी र किरण श्रेष्ठले गरेका थिए ।
