बाराको निजगढ नगरपालिकास्थित तामागढी–रतनपुर सडकको तपस्वीस्थल नजिकको जंगलमा मोटरसाइकल दुर्घटना हुँदा मंगलवार बिहान एक जनाको मृत्यु भएको छ ।
दुर्घटनामा अर्का एक जना गम्भीर घाइते भएका छन ।
रतनपुरबाट निजगढतर्फ आउदै गरेको प्र २–०३ –००६ प २७८० नम्बरको मोटरसाइकल आफै अनियन्त्रित भइ बिहान ११ः ३० बजे सडक किनाराको रुखमा ठोक्किँदा मोटरसाइकल चालक निजगढ नगरपालिका वडा नम्बर १३ बस्ने अन्दाजी वर्ष २५ का सुरेन्द्र घलानको घटनास्थलमा नै ज्यान गएको इलाका प्रहरी कार्यालय निजगढले जानकारी दिएको छ ।
दुर्घटनामा मोटरसाइकलको पछाडि सवार सोही ठाउँ बस्ने वर्ष ४२ को रामबहादुर बम्जन घाइते भएका हुन । उनको दाहिने खुट्टा र शरीरको विभिन्न भागमा चोट लागेको छ ।
बम्जनको सामुदायिक अस्पताल निजगढ, प्रसुती गृहमा उपचारपछि थप उपचारको लागि वीरगञ्जस्थित नेशनल मेडिकल कलेजमा पठाइएको प्रहरीले जानकारी दिएको छ ।
