निजगढ प्रहरीले अवैध लागु औषध ट्रामाडोल सहित चार जनालाई पक्राउ गरेको छ । निजगढ प्रहरीले निजगढ नगरपालिका–९ बाट लागु औषध ट्रामाडोल १३० प्याकेटसहित ४ जनालाई पक्राउ गरेको छ ।

पक्राउ पर्नेमा निजगढ नगरपालिका वडा नम्बर ९ क्याम्पस चोक बस्ने प्रेमबहादुर पाख्रिनको श्रीमती अन्दाजी वर्ष ६० की फुलमाया पाख्रिन, निजगढ वडा नम्बर ८ बुद्ध चोक बस्ने बिरेन्द्र मुक्तानको छोरा अन्दाजी वर्ष १९ को विवेक लामा मुक्तान, निजगढ नगरपालिका वडा नम्बर ३ सिंगौल बस्ने जितबहादुर जिम्बाको छोरा अन्दाजी वर्ष २४ को रेमन जिम्बा र भक्तपुर जिल्ला चागुनारायण नगरपालिका वडा नम्बर ६ पिपल बोट बस्ने कृष्णबहादुर बल तामाङको छोरा अन्दाजी वर्ष ३१ को लेखबहादुर बल तामाङ रहेका छन ।

निजगढ ९ का प्रेमबहादुर पाख्रिनको घरमा लागु औषधको किनबेच भइरहेको भन्ने सूचनाको आधारमा ईलाका प्रहरी कार्यालय निजगढबाट पुगेको टोलीले निजको घरको कुखुरा र बाख्राको खोरमा खानतलासी गर्दा सेतो बोरा र कालो प्लाष्टिकको झोलामा लुकाई छिपाई राखेको अवस्थामा ट्रामाडोल १३० प्याकेट १३०० पिससहित उनीहरुलाई आइतवार दिउसो नियन्त्रणमा लिएको ईलाका प्रहरी कार्यालय निजगढका प्रहरी निरीक्षक सुमित कुशवाहाले बताए ।

पक्राउ परेकाहरुलाई जिल्ला अदालत बारामा पेस गरी ८ दिनको म्याद लिएर थप अनुसन्धान गरिरहेको निजगढ प्रहरीले जानकारी दिएको छ ।