निजगढ नगरपालिका ६ स्थित श्री कृष्ण प्रणामी मन्दिरको ३१ औं वार्षिकोत्सव आजबाट सुरु भएको छ । मन्दिरको बार्षिकोत्सवको अवसरमा आज बिहान मोटरसाइकल र्याली निकालिएको थियो । मोटरसाइकल र्यालीमा बारा क्षेत्र नम्बर १ का प्रतिनिधि सभा सदस्य अच्युत प्रसाद मैनालीको समेत सहभागिता रहेको थियो ।
वार्षिकोत्सवको अवसरमा श्रीमद तारतम सागर पाठ–परायण सहित पाँच दिने कार्यक्रम समेत सुरु भएको मन्दिर समितिका अध्यक्ष यादवकुमार तिमल्सिनाले बताए ।
वार्षिकोत्सव अवसरमा कृपासिन्धु मेहेर सागर आश्रम शुक्लैयाका प्रमुख संचालक साहित्याचार्य श्रीजनार्दन घिमिरे तथा श्री कृष्ण प्रणामी समाजकी प्रखर वक्ता विद्धुषी उषा घिमिरेले संगीतमय श्रीकृष्ण कथा प्रवचन गरिने समितिका अध्यक्ष तिमल्सिनाले बताए ।
चैत्र १ गते कलश यात्रा, चैत्र २ गते रक्तदान कार्यक्रमको पनि आयोजना गरिने भएको छ । त्यसैगरी चैत्र ३ गते दन्त शिविर कार्यक्रम आयोजना गर्ने तयारी गरिएको अध्यक्ष तिमल्सिनाले बताए ।
सोही अवसरमा हरेक दिन बिहान पुष्प अर्पण, दिउसो ब्रह्मवाणी प्रवचन र साँझ सन्ध्याकालिन सेवा पूजा र राति ८ बजेदेखि १० बजेसम्म रासरामत झाँकी एंव भजनकिर्तन गरिने तिमल्सिनाले जानकारी दिए ।
