निजगढ नगरपालिकाले आगामी आर्थिक वर्ष २०७७/०७८ को नीति तथा कार्यक्रम र बजेट आज सार्वजनिक गरेको छ ।

निजगढ नगरपालिकाका मेयर सुरेश कुमार खनालको सभापतित्वमा भएको नगर सभामा उपमेयर लिलादेवी लामिछाने खनालले आगामी वर्षकालागि ८८ करोड ४९ लाख ५० हजार रुपैयँ बराबरको बजेट सार्वजनिक गरेकी हुन।

नगरपालिकाले कृषि क्षेत्र, स्वास्थ्य तथा रोजगारी सृजना गर्ने खाल्का कार्यहरुलाई प्राथमिकतामा राखी नीति तथा कार्यक्रमहरु ल्याएको देखिन्छ।

नगरपालिकाको नीति तथा कार्यक्रमको प्राथमिकता स्वास्थ्य र शिक्षा क्षेत्रको सुधार,कृषि र पशु क्षेत्रको बिकास,भौतिक पूर्वाधार बिकास, खानेपानी सरसफाई व्यवस्थापन, युवा स्वरोजगार शिप व्यवस्थापन, सेवा प्रवाह र सुचना प्रविधि, पर्यटकीय पूर्वाधार बिकास, लक्षित बर्गको क्षमता बिकास, खेलकुदको बिकास र कला संस्कृतिको जगेर्ना, भुमि व्यवस्थापन लगायत रहेका छन ।

सडकलाई नगरको प्रमुख प्राथमिकता प्राप्त क्षेत्रको रुपमा आत्मसाथ गर्दै वार्षिक ७ किलोमिटर पक्कि सडक बनाउने नीतिलाई निरन्तरता दिने नीति लिएको छ ।

वडा नम्बर ९ स्थित रंगशाला नजिक ट्रक तथा बस पार्कको निर्माण कार्य अघि बढाईने, शहरी खानेपानी आयोजना सुरुवात गरिने, वैकल्पिक उर्जाको दिगो श्रोतको रुपमा रहेको सौर्य उर्जा उत्पादनको सम्भाव्यता अध्ययन गरिने, बकैया नदीको पानीको रिचार्ज तथा सिंचाई, नदि नियन्त्रण कार्यलाई समेत सहयोग गर्नेगरी चेक ड्यामको निर्माण गरिने, सामुदायिक विध्यालयहरुमा निशुल्क पठनपाठनमा सहयोग गर्नकालागी विध्यार्थी संख्याको आधारमा नगरपालिकाबाट थप अनुदानको व्यवस्था मिलाईने, संस्थागत विध्यालयहरुको वर्गीकरण, शुल्क निर्धारण गरिने लगायत नगरपालिकाको मुख्य नीतिहरुमा उल्लेख भएको नगर सभालाई सम्बोधन गर्नुहुँदै मेयर सुरेश कुमार खनालले बताए ।

संघीय सरकार मार्फत वित्तीय समानीकरण अन्तर्गत १२ करोड २४ लाख,ससर्त अनुदान २० करोड ४७ लाख, राजश्व बाडफाड ९ करोड ७४ लाख, विशेष अनुदान २ करोड ५० लाख, प्रदेश सरकार वित्तीय समानीकरण ७३ लाख ४१ हजार,प्रदेश ससर्त अनुदान ८० लाख, विशेष अनुदान २० लाख, समपुरक अनुदान ३० लाख, सवारी साधन राजश्व बाडफाड १ करोड ९१ लाख र आन्तरिक आय ३७ करोड ५९ लाख लगायत अन्य आम्दानि सहित ८८ करोड ४९ लाख ५० हजारको बजेट तथा कार्यक्रम उपमेयर लिलादेवी लामिछाने खनालले प्रस्तुत गरेकी हुन ।