बाराको निजगढ नगरपालिका वडा नम्बर ४ स्थित बकैया नदीमा अहिले वर्षातको समयमा खोलामा आउने बाढी गाउँ पस्न नदिन बकैया खोलालाई च्यानालाईज गर्ने कार्य भईरहेको छ ।

अघिल्लो वर्षको बाढीले पुर्वी तटबन्द कटान गरेपछि नगरले वर्षात अघि नै काम सक्ने गरी खोलालाई च्यानालाईज गर्न थालेको हो । नदीले धार परिवर्तन गरेर अघिल्लो वर्ष पूर्वी तटबन्द कटान गरे पछि नियन्त्रण गर्न खोलाको धार परिवर्तन गरी तटबन्ध निर्माण सुरु गरिएको निजगढ नगरपालिकाले जनाएको छ ।

कार्यपालिकाको बैठकबाट निर्णय गराई ७ वटा एक्साभेक्टर मार्फत यति बेला खोलाको धार परिवर्तन गर्ने कार्य भईरहेको छ । खोलाको धार परिवर्तन गर्दा जिल्ला अनुगमन तथा समन्वय समितिले दुःख दिएको र केही सञ्चार माध्यमले खोला दोहन गरेको समाचारको कार्यपालिका बोर्डले आफुहरुको ध्यानाकर्षण भएको जनाएको छ ।

वर्षात अघि नै नदीजन्य पदार्थको व्यवस्थित उत्खनन गरी नदीलाई च्यानालाईज गरी बस्ती जोगाउन र वर्षात शुरु हुन केही दिन मात्र बाँकी छदाँ स्थानीयहरुले समेत बस्ती जोगाउन व्यापाक दवाव दिएपछि कार्यपालिकाबाट निर्णय गराई अहिले खोलालाई च्यानालाईज गर्ने काम भईरहेको निजगढ नगरपालिका वडा नं ४ पुराने निजगढका जनकधारी चैधरीले बताए ।

प्रारम्भिक वातावरणीय परिक्षणको प्रतिवेदन बमोजिम नगरले खोलामा थ्रुप्रिएको नदीजन्य पदार्थ उत्खनन एवं वितरण गर्न ठेक्का आव्हान गरेको थियो । खोलालाई ६ वटा प्लटमा विभाजन गरी एक करोड २२ लाख ४३ हजार घनमिटर नदिजन्य पदार्थ निकाल्न ठेक्का लगाएको थियो । ठेक्का लगाउने वित्तिकै ठेक्काको विषयलाई लिएर मुद्धा पर्नु, ठेक्का समयमा लगाउन नसक्नु, त्यसपश्चात लकडाउन शुरु हुनु जस्ता कार्यले गर्दा खोलाबाट उत्खनन् गर्न नसकिएको नगरले जनाएको छ ।

निजगढ नगरपालिकाका उपप्रमुख लिलादेवी लामिछाने खनालले नगरपालिकाले नदी उत्खनन र दोहन गरेको नभई बर्षायाममा निजगढमा बाढी पस्ने जोखिम बढेकोले हाल बकैया खोला नियन्त्रणको लागि तटबन्ध र नदी च्यानलाइजिङ्ग कार्य गरेको बताईन । निजगढ नगरपालिकाको वडा नं. ४, ८ र ९ हुँदै बग्ने बकैया नदिले धार परिवर्तन गरी वर्षेनी दुःख दिएपछि कार्यपालिकाको निर्णय बमोजिम खोलाको धार परिवर्तन गरी अस्थाई तटबन्ध निर्माण गर्ने निर्णय भएको उपप्रमुखे खनालले बताईन ।

नदीको पश्चिम तर्फ थुप्रिएको ढुंगागिटी वर्षात अघि नै ननिकाल्ने हो भने खोलाले धार परिवर्तन गरी गाउँ पस्ने भएपछि अहिले ठेकेदार मार्फत नै उक्त क्षेत्रको उत्खनन गराईएको र आफुहरुको प्रत्यक्ष निगरानीमा खोलाको च्यानालाईज गर्ने काम भईरहेको हुँदा ठेकेदारले बदमासी गर्न नसक्ने निजगढ नगरपालिकाका नगरप्रमुख सुरेश कुमार खनालले बताए ।

निजगढलाई बाढीबाट बचाउन बकैया खोलाको तटबन्ध गर्ने काम जल उत्पन्न प्रकोप कार्यालय, राष्ट्रपति चुरे संरक्षण कार्यक्रम जस्ता निकायले गर्ने भएता पनि हालसम्म कुनै ठोस कार्य हुन सकेको छैन ।