होली एन्जल्स इङ्लिस बोर्डिङ स्कुलले प्रधानमन्त्री दैवी प्रकोप उद्धार कोषमा १ लाख ५ हजार रुपैयाँ सहयोग गरेको छ ।

प्राकृतिक विपद्का कारण प्रभावित नागरिकको राहत तथा उद्धारमा सहयोग पुर्याउने उद्देश्यले विद्यालयले उक्त रकम प्रदान गरेको हो । विपद्को कठिन परिस्थितिमा पीडित परिवारको सहयोगका लागि सामाजिक उत्तरदायित्वअन्तर्गत आर्थिक सहयोग गरिएको विद्यालयले जनाएको छ ।

विद्यालयका सञ्चालक नारायणप्रसाद शर्माले विपद्को समयमा पीडित तथा प्रभावित नागरिकको साथमा उभिनु सबैको साझा दायित्व भएको बताए । राज्यका निकायले सञ्चालन गर्ने राहत तथा उद्धार अभियानमा नागरिक, शैक्षिक संस्था तथा निजी क्षेत्रबाट हुने सहयोगले थप योगदान पुग्ने उनको भनाइ छ ।

शर्माले विपद्बाट प्रभावित नागरिकको राहत, उद्धार तथा पुनःस्थापनाका लागि आवश्यक सहयोग उपलब्ध गराउने उद्देश्यले विद्यालयको तर्फबाट १ लाख ५ हजार रुपैयाँ सहयोग गरिएको बताए ।

उनले विपद्को समयमा आर्थिक सहयोगसँगै मानवीय भावना र सामाजिक एकताको आवश्यकता रहेको उल्लेख गर्दै सक्षम व्यक्ति, संस्था तथा व्यवसायीलाई आ-आफ्नो क्षमताअनुसार सहयोग गर्न आग्रह गरे ।

होली एन्जल्स इङ्लिस बोर्डिङ स्कुलले सामाजिक उत्तरदायित्वअन्तर्गत यसअघि पनि विभिन्न सामाजिक तथा मानवीय गतिविधिमा सहभागिता जनाउँदै आएको जनाएको छ । विद्यालयले आगामी दिनमा पनि समुदायमा आवश्यकताअनुसार सामाजिक सेवाका गतिविधिमा योगदान गर्ने प्रतिबद्धता जनाएको छ ।